၂၀၁၈ ခုနှစ် အကယ်ဒမီအတွက် ရွေးချယ်ထားတဲ့ ရွှေကြိုမောင်/မယ် များရဲ့ ရင်ခုန် စကားသံများ

နှစ်စဉ်နှစ်တိုင်း အကယ်ဒမီဆု ချီးမြှင့်တဲ့ အခမ်းအနားမှာ မပါမဖြစ် ပါဝင်လေ့ရှိတာက ရွှေကြိုမောင်မယ်များပဲ ဖြစ်ပါတယ်။ ၂၀၁၈ ခုနှစ်အတွက် အကယ်ဒမီဆုချီးမြှင့်ခြင်း အခမ်းအနားမှာတော့ ရွှေကြိုအဖြစ် အနုပညာရှင်များရဲ့ မျိုးဆက်သစ် သားသမီးတွေကို ရွေးချယ်ခဲ့ကြပါတယ်။ မကြာခင်ပြုလုပ်မယ့် ၂၀၁၈ ခုနှစ်အတွက် အကယ်ဒမီ ပေးပွဲမှာတော့ ရွှေကြို ယောက်ျားလေး ၅ ယောက်၊ မိန်းကလေး ၅ ယောက် ရွေးချယ်ခဲ့ပါတယ်။

ရွှေကြို အမျိုးသားတွေအနေနဲ့ သရုပ်ဆောင် နေထက်လင်းရဲ့သား ထက်လင်းအောင်၊ နေမင်းရဲ့တူ အုပ်သာကျော်၊ သရုပ်ဆောင် ခင်ဇာခြည်ကျော်ရဲ့သား ဘုန်းမင်းနေလ၊ သရုပ်ဆောင် မင်းသူရဲ့သား မင်းခန့်ကိုကို၊ သရုပ်ဆောင် ကိုကိုဦးရဲ့သား သီဟအောင်တို့ ပါဝင်မှာ ဖြစ်ပါတယ်။

ရွှေကြို အမျိုးသမီးတွေအနေနဲ့ သရုပ်ဆောင် အိန္ဒြာကျော်ဇင်ရဲ့ တူမ မေတိုးခိုင်၊ သရုပ်ဆောင် ခင်လှိုင်ရဲ့ သမီး သဇင်ထူးမြင့်၊ သရုပ်ဆောင် မြင့်မြင့်ခင်ရဲ့မြေး ဝတ်မှုံသန့်နဲ့ မျိုးဆက်သစ် သရုပ်ဆောင်တွေ ဖြစ်ကြတဲ့ နန်းရွှေရည်နဲ့ ဆောင်းယွန်းစံတို့ ဖြစ်ပါတယ်။

ရွှေကြိုမှာ ပါဝင်ခွင့်ရတဲ့ သူတို့တွေကိုတော့ မတ်လ ၆ ရက်နေ့၊ မြန်မာနိုင်ငံ ရုပ်ရှင် အစည်းအရုံးမှာ အကယ်ဒမီ ရန်အောင်နဲ့ မေသန်းနုတို့က အစမ်းလေ့ကျင့်ပေးနေပြီ ဖြစ်ပါတယ်။ အစမ်းလေ့ကျင့်တဲ့အပေါ် ရွှေကြိုမောင်/မယ်များက သူတို့အတွေ့အကြုံတွေကို အခုလိုပဲ ပြောပြထားပါတယ်။

ထက်လင်းအောင်

“ဒီနေ့ လေ့ကျင့်တော့ အခက်အခဲလေးတွေ ရှိတယ်။ လမ်းလျှောက်တွေ အဆင်မပြေသေးဘူး။ လှည့်တာတွေလည်း မရသေးဘူး။ ဦးရန်အောင်နဲ့ အန်တီဆင့်တို့ သင်ကြားပေးနေတဲ့အတွက် သင်ယူစရာတွေ အများကြီးရပါတယ်။ မေတိုးခိုင် နေမကောင်းတဲ့အတွက် အန်တီဆင့်နဲ့ လေ့ကျင့်ရတော့ ကြောက်နေတာ။ ကျနော် စင်ပေါ်ရောက်ရင်လည်း မလုပ်နိုင်မှာ တော်တော်တော့ စိုးရိမ်တယ်။ ကျနော် အိမ်မှာလည်း သေချာကြိုးစားလေ့ကျင့်မှာပါ။ ကျနော် မရှက်တတ်အောင် ပြင်ဆင်ရမယ်။ အိမ်ရောက်ရင် မေမေနဲ့လည်း လေ့ကျင့်ဖို့လည်း ရှိတယ်။ ညီလေးနဲ့လည်း လေ့ကျင့်ဖြစ်တယ်”လို့ သရုပ်ဆောင် နေထက်လင်းရဲ့ သားဖြစ်သူ ထက်လင်းအောင်က ပြောပါတယ်။

အုပ်သာကျော်

“နိုင်ငံတော်ပွဲကြီးမှာ ကျနော်အနေနဲ့ ဂါဝရပြု ပါဝင်ရတဲ့အတွက် အရမ်းဂုဏ်ယူမိပါတယ်။ ကျနော်တို့ကို ဒီနေ့ ထရိန်နင်ပေါ့။ ကျနော် စိတ်လှုပ်ရှားတွေတော့ သိပ်မရှိဘူး။ ကိုရန်အောင်နဲ့ မဆင့်တို့ကလည်း သေချာသင်ပေးပါတယ်။ စင်ပေါ်ရောက်ရင်တော့ ကိုယ့်အနေနဲ့ အမှားပါမှာတော့ စိုးရိမ်တယ်။ ကျနော် အနုပညာလောက်ထဲကို ရောက်ပြီးသားဆိုတော့ ညီငယ်လေးတွေကိုလည်း ကူညီပေးလို့ရတာတွေ ကူညီပေးပါတယ်”လို့ သရုပ်ဆောင် နေမင်းရဲ့ တူဖြစ်သူ အုပ်သာကျော်က ပြောပါတယ်။

ဘုန်းမင်းနေလ

“ဒီနေ့အတွေ့အကြုံက ကျနော်ရှိုးတွေလည်း မလျှောက်ဖူးဘူး။ မော်ဒယ်လည်း မလုပ်ဖူးဘူး။ လမ်းလျှောက်နည်းတွေနဲ့ လျှောက်ရတာပေါ။ ကောင်းပါတယ်။ ပျော်စရာကြီးပါ။ ရှက်နေတာတော့ မရှိဘူး။ ကျနော်နဲ့တွဲတဲ့ သဇင်ထူးမြင့်က စကား နည်းတယ်။ နည်းနည်း ရှိန်နေတယ်။ အဆင်ပြေသွားမှာပါ။ ဒီနေ့ကလည်း ပထမဦးဆုံး နေ့မို့ပါ။ စင်ပေါ်မှာ အဆင်ပြေအောင် ကျနော် လေ့ကျင့်ရဦးမယ်”လို့ သရုပ်ဆောင် ခင်ဇာခြည်ကျော်ရဲ့ သားဖြစ်သူ ဘုန်းမင်းနေလက ပြောပါတယ်။

မင်းခန့်ကိုကို

“ကျနော် အစမ်း လေ့ကျင့်တာပေါ့။ စစချင်းက ရှက်တယ်။ နောက်တော့ မရှက်တော့ဘူး။ ပညာ အများကြီးရတယ်။ ကိုရန်အောင်နဲ့ မဆင့်တို့ကလည်း သေချာ သင်ပေးပါတယ်။ ပညာတွေလည်း အများကြီး ရတယ်။ ရှက်တာတွေလည်း ရှိတယ်။ အဲ့တာတွေလည်း ပြင်ရမယ်”လို့ သရုပ်ဆောင် မင်းသူရဲ့သား မင်းခန့်ကိုကိုက ပြောပါတယ်။

သီဟအောင်

“အတွေ့အကြုံလေးတွေကတော့ ညီအစ်ကို၊ မောင်နှမတွေနဲ့ လေ့ကျင့်ရတာဆိုတော့ ပျော်ဖို့လည်းကောင်းတယ်။ အခက်အခဲကတော့ တွဲဖက်နဲ့ အခုမှ စလမ်းလျှောက်တာဆိုတော့ အဲဒါလေး တိုင်ပင်လေး ညီဖို့တော့ အခက်အခဲ ရှိတယ်။ ရှက်နေတာတော့ မရှိဘူး။ အိမ်ရောက်ရင် လမ်းလျှောက်တာလေးတွေ ပြင်ရမယ်။ စင်ပေါ်ရောက်ရင်လည်း အကြောက်ရွံ့ မရှိအောင် အကောင်းဆုံးတော့ ကြိုးစားသွားမယ်”လို့ သရုပ်ဆောင် ကိုကိုဦးရဲ့ သားဖြစ်သူ သီဟအောင်က ပြောပါတယ်။

သဇင်ထူးမြင့်

“တက်ညီလက်ညီနဲ့ မောင်နှမတွေ တိုက်ကြတာ ပျော်ဖို့ ကောင်းပါတယ်။ အခက်အခဲကတော့ မျက်လုံးချင်း ဆုံပြီး ကြည့်တာ အခက်အခဲလေးတွေ ရှိတယ်။ မရင်းနှီးသေးတာလည်း ပါမယ်။ နောက်ပိုင်း တိုက်တာတော့ အဆင်ပြေပါတယ်။ အစကတော့ ရှက်နေတယ်။ နောက်တော့ သိပ်မရှက်တော့ဘူး။ ဦးရန်လေးနဲ့ အန်တီဆင့်က ရှက်မနေဘဲ စည်းစည်းလုံးလုံးနဲ့ ပျော်ပျော်ရွှင်ရွှင်လေးဖြစ်အောင် သင်ပေးတယ်။ ရပ်တာက ဒေါက်နဲ့ ယိုင်နေတယ်။ စိတ်လှုပ်ရှားတော့ ပိုယိုင်တယ်။ အဲဒါလေးတော့ သေချာပြင်ဆင်သွားမယ်”လို့ သရုပ်ဆောင် ခင်လှိုင်ရဲ့ သမီးဖြစ်သူ သဇင်ထူးမြင့်က ပြောပါတယ်။

ဝတ်မှုံသန့်

“ဒီရွှေကြို ပါဝင်ရတော့ ဘဝရဲ့ မှတ်တိုင်တခု ဖြစ်သွားတယ်။ ဒီနေ့ စလေ့ကျင့်တော့ ဖိနပ်နဲ့ အခက်အခဲတွေ့တာပေါ့။ အမြင့်နဲ့ လျှောက်နေကျ မဟုတ်တော့ အဲဒါလေး တခုပါပဲ။ ကိုရန်အောင်နဲ့ မဆင့်တို့ကလည်း သေချာသင်ပေးပါတယ်။ ပညာလည်း ရတယ်။ ညီမက ရှက်မနေဘဲ ရယ်ချင်တယ်။ အဲဒါတော့ ထိန်းထားရတယ်။ စင်ပေါ်မှာ အဆင်ပြေအောင် အခုကတည်းက ကိုယ်နဲ့ တွဲရမယ့် သူနဲ့တော့ စကားတွေ ပြောဖြစ်တယ်။ ဖေဖေက ဘေးကနေ အမှား၊ အမှန်ကို ပြောပြပြီး ကူညီပေးပါတယ်”လို့ သရုပ်ဆောင် မြင့်မြင့်ခင်ရဲ့ မြေး ဝတ်မှုံသန့်က ပြောပါတယ်။

နန်းရွှေရည်

“ဒီနေ့ အတွေ့အကြုံ ကိုရန်အောင်နဲ့ မဆင့်တို့ကလည်း သေချာသင်ပေးတာကြောင့် ပညာတွေ ထပ်တိုးပါတယ်။ လမ်းလျှောက်တဲ့ အပိုင်းတွေကိုလည်း သေချာသင်ယူရတယ်။ အခုလို ပါရတာလည်း အရမ်းဝမ်းသာတယ်။ အရင် ဗန်းကိုင်ခေါ်ကတည်းက လျှောက်တယ်။ အကြောင်းအမျိုးမျိုးကြောင့် ကျန်ခဲ့တယ်။ အခုဒီနှစ်တော့ ပါခဲ့တဲ့အတွက် အတိုင်းမသိ ဝမ်းသာရတယ်”လို့ မျိုးဆက်သစ် သရုပ်ဆောင် နန်းရွှေရည်က ပြောပါတယ်။

ဆောင်းယွန်းစံ

“အစမ်းလေ့ကျင့်တာ အရင်ကရှိုးတွေ လျှောက်ဖူးပေမယ့် အခု လျှောက်ရမှာတော့ အရမ်းရင်ခုန်တယ်။ အမှားအယွင်း ဖြစ်မှာလည်း ကြောက်တယ်။ ကိုယ် ရွှေကြို ဖြစ်ဖို့ ၁၉ ၊၂၀ တုန်းက ကြိုးစားခဲ့တယ်။ မရနိုင်ဘူးလို့ ထင်တဲ့အချိန်ကျမှ လုပ်ရတော့ အဲ့ခံစားချက်က ဘာနဲ့မှ လဲလို့ မရဘူး။ အဲဒီအချိန်တုန်းက စိတ်ဓာတ်ကျပြီး လှည့်သွားရင် အခုလို ပါဝင်ရမှာ မဟုတ်ပါဘူး။ အဲ့အချိန်ကတည်းက ကြိုးစားပြီး အနုပညာကို လျှောက်ခဲ့တယ်”

“အဲ့အတွက် ဒီအခွင့်အရေးကို လက်ဆောင်အဖြစ် ရခဲ့တယ်။ အဲ့အတွက် ဒီရွှေကြိုနေရာလေးကို ကိုယ် ၅ နှစ်လောက် ကြိုးစားခဲ့လို့ ရတာဖြစ်တဲ့အတွက် ဒီနေရာလေးက မထိုက်တန်ဘူးလား။ ကိုယ်ကြိုးစားခဲ့တဲ့အတွက် ရရှိခဲ့တာကြောင့် ဒီနေရာလေးကိုတော့ ခံစားခွင့်ပေးပါလို့ ပြောချင်ပါတယ်။ စင်ပေါ်မှာ စိတ်ငြိမ်အောင် အခုရက်ပိုင်းကတည်းက ပုတီး စိပ်တယ်။ တရား ထိုင်တယ်။ အမှားအယွင်း မရှိအောင် ကြိုးစားသွားမှာပါ”လို့ သရုပ်ဆောင် ဆောင်းယွန်းစံက ပြောပါတယ်။

အနုပညာလောကသားတွေသာမက ပရိသတ်တွေပါ စောင့်မျှော်နေကြတဲ့ ၂၀၁၈ ခုနှစ်အတွက် အကယ်ဒမီ ရုပ်ရှင်ထူးချွန်ဆု ချီးမြှင့်ပွဲကြီးကို ၂၀၁၉ ခုနှစ်၊ မတ်လ ၂၃ ရက်နေ့၊ ရန်ကုန်မြို့ The One Entertainment မှာ ကျင်းပသွားမှာ ဖြစ်ပါတယ်။ ၂၀၁၈ ခုနှစ်အတွက် အကယ်ဒမီ ထူးချွန်ဆုပေးပွဲမှာ ရုပ်ရှင်ထူးချွန်ဆု ၁၁ ဆုကနေ ၁၃ ဆုကြား ပေးအပ်သွားမယ်လို့ သိရပါတယ်။

Topics: ၂၀၁၈ အကယ်ဒမီ, ရွှေကြိုမောင်များ
Source : irrawaddy
Share From swelsonenews