မြန်မာဟက်ကာအဖွဲ့က ထိုင်းအုပ်ချုပ်ရေးဝက်ဆိုက် ၁၂၀ ကို ထိန်းချုပ်လိုက်ပြီး ၀င်း နှင့် ဇော်တို့ရဲ့ ပုံနှင့် နိုင်ငံတော် သီချင်းကို တင်ထားခဲ့

ထိုင်းနိုင်ငံ၊ ကော့စမွီခရိုင်၊ လိပ်ကျွန်းမှာ ဖြစ်ပွားခဲ့တဲ့ လူသတ်မှုနဲ့ ပတ်သက်ပြီး မြန်မာရွှေ့ပြောင်းလုပ်သား နှစ်ဦးဖြစ်တဲ့ ဝင်းဇော်ထွန်းနဲ့ ဇော်လင်းတို့ကို သေဒဏ်ချမှတ်လိုက်တဲ့အတွက် တရားမျှတမှုနဲ့ အမှန်တရား ပေါ်ပေါက်ရေးအတွက်ဆိုပြီး Union of UnderGround Myanmar Hackers အဖွဲ့က ထိုင်းအုပ်ချုပ်ရေး ပိုင်းဆိုင်ရာ ဝက်ဆိုဒ် ၁၂ဝ ကို ထိန်းချုပ်လိုက်ပြီလို့ ဒီကနေ့ သြဂုတ်လ ၃၁ ရက်နေ့၊ မနက်ပိုင်းက ထုတ်ပြန် ထားပါတယ်။

Union of UnderGround Myanmar Hackers အဖွဲ့က ထိန်းချုပ်လိုက်ပြီးဖြစ်တဲ့ အဲ့ဒီ ထိုင်းအုပ်ချုပ်ရေး ပိုင်းဆိုင်ရာဝက်ဆိုဒ်တွေကို လက်ရှိမှာ ဝင်ကြည့်မယ်ဆိုရင် ဝင်းဇော်ထွန်းနဲ့ ဇော်လင်းတို့ရဲ့ ပုံတွေနဲ့အတူ မြန်မာနိုင်ငံတော်သီချင်း တီးလုံးအသံကိုပဲ တွေ့မြင်ရမှာဖြစ်ပါတယ်။

၂၀၁၄ ခုနှစ်က ထိုင်းနိုင်ငံက လိပ်ကျွန်းမှာ အင်္ဂလန်နိုင်ငံက အသက် ၂၄ နှစ်အရွယ် မစ္စတာဒေးဗစ်မီလော်နဲ့ အသက် ၂၃ နှစ်အရွယ် မစ္စ ဟာနာဗစ်တိုရီယာတို့ အသတ်ခံခဲ့ရပြီး အဲ့ဒီလူသတ်မှုနဲ့ပတ်သက်လို့ စုံးစမ်းမှုအရ မြန်မာရွှေ့ပြောင်းလုပ်သား နှစ်ဦးဖြစ်တဲ့ ဝင်းဇော်ထွန်းနဲ့ ဇော်လင်းတို့ကို ထိုင်းရဲတပ်ဖွဲ့က ဖမ်းဆီးတရားစွဲ တင်ခဲ့တာဖြစ်ပါတယ်။
ဝင်းဇော်ထွန်းနဲ့ ဇော်လင်းတို့ကို လူသတ်မှု၊ မုဒိန်းမှု၊ ပစ္စည်းလုယက်မှုတွေအပါအဝင် ပုဒ်မ ၇ ခုနဲ့ ကော့စမွီခရိုင် တရားရုံးက ၂ဝ၁၅ ခုနှစ်၊ ဒီဇင်ဘာလ ၂၄ ရက်နေ့မှာ သေဒဏ်ချမှတ်ခဲ့ရပါတယ်။

ဒါကြောင့် အယူခံအဆင့်ဆင့်တက်ခဲ့ပေမယ့် ပယ်ချခံခဲ့ရပြီး နောက်ဆုံး ထိုင်းနိုင်ငံရဲ့ အမြင့်ဆုံးတရားရုံးချုပ်ကို အယူခံတက်ခဲ့ပါတယ်။ အဲ့ဒီအမြင့်ဆုံးတရားရုံးကလည်း သြဂုတ်လ ၂၉ ရက်နေ့မှာ မူလတရားရုံးရဲ့ သေဒဏ်ချအမိန့်ကိုသာ ဆက်လက်အတည်ပြုခဲ့တာကြောင့် ဝင်းဇော်ထွန်းနဲ့ ဇော်လင်းတို့အတွက် ထိုင်းဘုရင်ထံကို အသနားခံစာတင်ရန်သာ ကျန်ရှိပါတယ်။

ဒီလို ထိုင်းနိုင်ငံရဲ့ အမြင့်ဆုံးတရားရုံးကလည်း သေဒဏ်ကို ဆက်လက်အတည်ပြုခဲ့တာကြောင့် Union of UnderGround Myanmar Hackers အဖွဲ့က တရားမျှတမှု ရရှိရေးအတွက်ဆိုပြီး သြဂုတ်လ ၃ဝ ရက်နေ့က စလို့ ထိုင်းအုပ်ချုပ်ရေးပိုင်းဆိုင်ရာ ဝက်ဆိုဒ်တွေကို တိုက်ခိုက်ခဲ့တာဖြစ်ပါတယ်။မနေ့ကအထိ ၀က်ဆိုက် 101 ခုကို ထိန်းချုပ်ခဲ့ပြီး ယနေ့ နောက်ထပ် ၀က်ဆိုက် 19 ခုကို ထပ်မံ ထိန်းချုပ်ခဲ့တာဖြစ် ပါတယ်

“ကျနော်တို့အနေနဲ့ တစ်ခြားနိုင်ငံတစ်ခု၏တရားစီရင်ရေးအား တရားသည်ဖြစ်စေ မတရားသည်ဖြစ်စေ ဝင်ရောက် စွက်ဖက်ခြင်းပြုလို့မရပါဘူး။ သို့သော် မတရားသောအဖြစ်ကို မတရားဘူးလို့ လူသိအောင် ပြောလို့ရသည်။ ထိုင်းတရားရေး၏ ဘက်လိုက်ဆုံးဖြတ်မှု၊ မတရားအကျင့်ယုတ်မှုများကို ထိုင်းနိုင်ငံသားများနှင့်တစ်ကွ အားလုံးသိအောင်ပြောဖို့ တာဝန်ရှိသည်ဟု ယူဆပါတယ်။ ကျနော်တို့ မြန်မာနိုင်ငံသား ညီအကိုများအရေးကို ကျနော်တို့မှ မလုပ်လျှင် ဘယ်သူမှလုပ်လိမ့်မည်မဟုတ်ပါ”လို့ Union of UnderGround Myanmar Hackers အဖွဲ့က သြဂုတ်လ ၂၉ ရက်နေ့မှာ ပြောဆိုထားပါတယ်။